Dapoi a creazione di a Casa Musicale, a vulintà d’ùn aduprà chè prudutti lucali hè inserita inde i nostri… piatti. Ùn hè questu un fattu ordinariu, a Corsica face vene d’altrò più di 90 % di l’alimentariu. Ma a terra Balanina porta in ella a stampa di i giardini, di l’arburi fruttii, di e vigne accumpulate à e nostre culline… Agricultori è allevatori à vi saperanu cuntà. Da carne à casgiu è pesciu, mele è erbe arumatiche, pustimi di u Cunventu di Curbara, oliu d’aliva è vini… tutti issi prudutti racontanu a storia d’issa piccula ecunumia regiunale chì face partita di a nostra divuzione. Prudutti impregni di e mane d’omi è donne chì i mettenu in ballu.
À i cucinari di quì è d’altrò, à quelli partuti è d’altri à vene, simu in debitu di tutte isse belle partizione musicale, à ringrazià !